O pasado 4 de febreiro celebrouse en Portas Ártabras, organizada por O Facho, unha palestra a cargo de Antón F. Malde titulada “Os camiños do poder: cambios na rede viaria e a organización territorial”.
Durante a súa intervención, Malde explicou como os cambios de poder reflíctense, inevitablemente, na rede viaria. A súa evolución non responde unicamente ás condicións xeográficas, senón tamén ás estruturas organizativas do territorio. Os camiños non poden entenderse só como simples vías de desprazamento, senón tamén como expresións de poder que determinan que lugares deben estar conectados.
Apoiándose en mapas antigos e topográficos, Malde mostrou os camiños que unían Brigantium (A Coruña) coa Ciadella (Curtis), un centro estratéxico clave para o transporte de mercadorías e a recadación de impostos en tempos do Imperio Romano. Esta rede de camiños mantívose durante a dominación romana e o reinado suevo, reflectindo a continuidade do poder na organización territorial.
Coa chegada da Idade Media, aparece un novo centro de poder: Santiago de Compostela, o que provoca transformacións na rede viaria. A nova organización medieval respondía a intereses distintos aos da época romana e sueva, o que derivou nunha reconfiguración dos camiños.
Unha vez máis, recorrendo ao impacto visual dos mapas, Malde ilustrou como estes roteiros modificáronse para adaptarse ás novas necesidades. A súa exposición deixou claro que a rede viaria é moito máis que un simple trazado sobre a paisaxe: é un reflexo dos cambios no poder e na estrutura social de cada época.
