Desde a Agrupación Cultural O Facho comunicámosvos a celebración do seguinte acto, dentro das palestras públicas do segundo trimestre de 2024.
O vindeiro dia 14 de maio a profesora e escritora Pilar García Negro, impartirá unha palestra co título:
” Luisa Villalta : Devir galega”
Data: 14 de maio, martes
Hora: ás 8 do serán
Lugar: Portas Ártabras – Rúa Sinagoga 22 baixo. Cidade Vella – A Coruña
Pilar García Negro é unha destacada lingüista e profesora galega, cunha extensa traxectoria académica e política. Estudou Filoloxía Hispánica e Filoloxía Galega na Universidade de Santiago de Compostela, onde se doutorou en 1991.
Comezou a súa carreira como profesora de lingua española en varios institutos antes de unirse á Universidade da Coruña en 1991, onde foi profesora titular desde 1995 no Departamento de Galego-Portugués, Francés e Lingüística. Ademais do seu labor académico, participou en numerosos congresos nacionais e internacionais sobre sociolingüística, literatura galega, e feminismo. Publicou edicións e estudos sobre destacados autores galegos e foi presidenta da Asociación Cultural Alexandre Bóveda da Coruña.
Pilar García Negro, ademais do seu destacado labor académico e a súa traxectoria como deputada no Parlamento de Galicia polo BNG desde 1989 ata 2003, é recoñecida polo seu coñecemento e estudo da obra de Luisa Villalta, a quen coñeceu e tratou en vida. Este interese levouna a ofrecer conferencias e contribucións significativas no ámbito do estudo e difusión do legado de Luisa Villalta.”
A palestra celebrarase ás 8 h do serán no local da Asociación de Amigos dos Museos de Galicia – Espazo Cultural Portas Ártabras- sito na Rúa Sinagoga nº 22-baixo 15001 A Coruña. Ver mapa
